რა განსხვავებაა ოფიციალურ და კომერციულ კურსს შორის?

ოფიციალურ კურსს საქართველოს ეროვნული ბანკი აქვეყნებს და ის საორიენტაციო ნიშნულია: მას იყენებენ, მაგალითად, ბუღალტრულ აღრიცხვასა და ოფიციალურ დოკუმენტებში. კომერციული კურსი კი ის ფასია, რომლითაც კონკრეტული ბანკი ან გადამცვლელი ვალუტას რეალურად ყიდულობს და ყიდის. როცა ვალუტას ცვლი, ყოველთვის კომერციული კურსით ცვლი.

ოფიციალური კურსი

ეროვნული ბანკი კურსს სამუშაო დღეებში აქვეყნებს და ის მომდევნო დღიდან მოქმედებს. ერთ ვალუტას ერთი ოფიციალური კურსი აქვს, ყიდვისა და გაყიდვის გარეშე. ზოგი ვალუტა 1 ერთეულზე კი არა, 10, 100 ან 1 000 ერთეულზე ქვეყნდება: მაგალითად, რუბლის კურსი 100 რუბლზეა გამოქვეყნებული.

კომერციული კურსი

ბანკსა და გადამცვლელს ორი კურსი აქვს: ყიდვის, რომლითაც შენგან ყიდულობს ვალუტას, და გაყიდვის, რომლითაც გყიდის. მათ შორის სხვაობას სპრედი ჰქვია და ის ორგანიზაციის შემოსავალია. კომერციულ კურსს ორგანიზაცია თავად ადგენს და დღის განმავლობაში რამდენჯერმე შეიძლება შეცვალოს.

რატომ არ ემთხვევა ისინი ერთმანეთს

• ორგანიზაცია ვალუტის ყიდვა-გაყიდვაზე მარჟას იღებს, ამიტომ ყიდვის კურსი ჩვეულებრივ ოფიციალურზე დაბალია, გაყიდვისა კი მაღალი.
• კომერციული კურსი ბაზრის ცვლილებას დღის განმავლობაში მიჰყვება, ოფიციალური კი დღეში ერთხელ იცვლება.
• ერთი ორგანიზაციის კურსიც კი შეიძლება განსხვავდებოდეს ფილიალში, ონლაინ და ბარათით გადახდისას.

რომელი კურსი გეხება შენ

თუ ვალუტას ცვლი, შენთვის კომერციული კურსია მნიშვნელოვანი: ჩაბარებისას ყიდვის კურსი, ყიდვისას გაყიდვის კურსი. ოფიციალური კურსი გამოგადგება იმის შესაფასებლად, რამდენად კარგია შეთავაზება: რაც უფრო ახლოსაა კომერციული კურსი ოფიციალურთან, მით ნაკლებს იხდი სხვაობაში.